4 mamyr kúni, saǵat 19:30-da elorda tórinde E. Rahmadıev atyndaǵy memlekettik akademııalyq fılarmonııada kóneniń kózindeı bolyp, ónerge ózindik órnek salyp kelgen «TURAN» folklorly-etnografııalyq ansambliniń «О́RTOLǴAÝ» atty konserti ótedi, dep habarlaıdy Egemen.kz.
«TURAN» folklorly-etnografııalyq ansambli shyǵarmashylyǵynyń bastaý alǵanyna bıyl 14 jyl toldy. 14 jyl óner joly úshin az ýaqyt emes. 2008 jyly mýzykanttardyń bastamasymen Qurmanǵazy atyndaǵy Qazaq ulttyq konservatorııasy stýdentterinen qurylǵan ujym búginde ónertaný ǵylymdarynyń doktorlary men magıstrleri, ulttyq konservatorııa men óner akademııasynyń aǵa oqytýshylary. Úlken izdenistiń arqasynda óz tyńdarmanyn taýyp jańa beleske shyqty. Dybystyń bizge beımálim qýatyn ashqan sheberler ózindik bıik rýhymen tyńdarmandy baýrap aldy.
Olar umyt bola bastaǵan tól aspaptardyń qudyretti áleýetine súıenip, bizge dúnıe-ǵalamǵa kózqarasyn tolǵaıdy. Erkindik esken kúı-jyrlar qazynasynan shashý shashady. Alǵashqy dybystan-aq bizdi jumbaq, múlde beımálim ózge álemge jeteleıdi. Olardyń shyǵarmalarynyń formasy ejelgi kóshpeli halyqtardyń kóne aspaptyq jáne vokaldyq týyndylarynyń úlgilerine jaqyn. О́tken men búginniń esten ketpes sýretin sıpattaıtyn dybysy erekshe jáne sıqyrly aspaptar.
Kóne, arhaıkalyq aspaptardyń únin jańǵyrtýǵa, sybyzǵy, shańqobyz, sazsyrnaı, sherter, jetigen, shińkildek, dombyra, qylqobyz sııaqty aspaptardy zamanaýı sıpatta jańǵyrtýdyń jańa tásilderi men formalaryn tabýǵa umtyldy.
Olar álemdi jaýlap alýǵa tyryspaıdy, álem olarǵa ózi qushaǵyn aıqara ashýda. Bedeldi konsert alańdarynda óner kórsetip, kóptegen baıqaý men festıvalda jeńiske jetti. Álemniń 70 elinde 600-den astam konsert ótkizdi. Qazaqstan, Fransııa, Izraıl, Túrkııa, Germanııa, Ońtústik Koreıa, AQSh, Ázerbaıjan, Reseı, Ispanııa, Norvegııa jáne t.b. elderde kórermenderin dán rıza qylyp, erekshe yqylas pen zor qoshemetke bólenip, aıtýly tulǵalardy moıyndatqan ataqty ujym. Qazaq mádenıetiniń ókilderi – «TURAN» – joǵary kásibı deńgeıdegi oryndaýshylar.
Keshke «QORQYT» etno-ansambli, fılarmonııa solısi, mýltı-aspapshy Edil Qusaıynov jáne «ÁLEM» estradalyq bı ansambli qatysady.
Ansambl quramynda Baýyrjan Bekmuhanbetov, Erjigit Álıev, Maqsat Medeýbek, Serik Nurmoldaev, Jantý Dadabaev syndy mýzykanttar bar.
Al keshte óner kórsetetin «QORQYT» etno-ansambli 2015 jyly qarashada qurylǵan. «QORQYT» etno-ansambline qazaqtyń halyq aspaptarynda (qobyz, qylqobyz, narqobyz, dombyra, syrnaı, múıiz syrnaı, shańqobyz, jetigen, sherter, daýylpaz, sazsyrnaı, bas dombyra, sybyzǵy, sý aǵash, toqyldaq jáne t.b.) oınaıtyn pikirles mýzykanttar jınalǵan. Ujymdaǵy árbir artıst birneshe aspapty, sondaı-aq sırek kezdesetin kómeımen qaılaý tehnıkasyn meńgergen. Ansambldiń kórkemdik jetekshisi Sholpan Qorǵanbek shyǵarǵan týyndylar jáne onyń avtorlyq óńdeýindegi kúıler, termeler men jyrlar ujym repertýarynyń negizin quraıdy. Ujymnyń shyǵarmashylyǵyna «Ǵasyrlar úni» II-halyqaralyq folklorly-etnografııalyq festıvalde, Shyǵarmashyl jastardyń «Shabyt» HH-halyqaralyq festıvalinde, «Kóne Taraz kúmbiri» etno-folklorlyq ansamblderdiń I-respýblıkalyq baıqaýynda joǵary baǵa berilgen. Qurylǵanynan bastap «QORQYT» gastroldik saparmen álemniń túrli elderinde óner kórsetti. 2020 jylǵy aqpanda «QORQYT» etno-ansambli 75 shyǵarmany toqtamastan oryndap shyǵyp, táýelsiz Qazaqstan tarıhynda eń uzaq konsert bergeni úshin Qazaqstannyń Gınnes rekordttar kitabyna endi.
«Álem» estradalyq bı ansambli – astanalyq fılarmonııa tarıhyndaǵy eń jas ujym, 2016 jyly qurylǵan. Ansambl artısteri klassıkalyq bı jáne modernnen bastap hıp-hop pen rok-n-rollǵa deıingi túrli bı stılin meńgergen. «Álem» estradalyq bı ansambliniń kórkemdik jetekshisi Laýra Muqaevanyń shyǵarmashylyq qorjynynda alýan sıpatty elýden astam qoıylym bar. Olardyń qatarynda álem halyqtarynyń bıleri, QR eńbek sińirgen qaıratkeri, «Parasat» ordeniniń kavaleri, professor Aıtqalı Jaıymovtyń jáne de basqa Qazaqstan kompozıtorlarynyń mýzykasyna qoıylǵan túrli horeografııalyq kompozısııalar bar. «Kún shýaq», «Bı álemi», «Shattaný», «Bı terbegen Astana», QR eńbek sińirgen artısi Toıǵan Izimniń mereıtoıyna arnalǵan «О́nermen órilgen 50 jyl ómirim» merekelik konserti, «Án shyrqaıyq bı bılep…» bı jáne án keshi syndy baǵdarlamalary kórermenderdiń kóńilinen shyǵyp, yqylasyna bólengen.